بو قونو افشین قاسم زاده (هارای) شاعیرین،یارادیجی لیغی حاقدا و هابئله اونون کونوللری اوخشایان بیر قوشماسی ایله بزه نیبدیر.بو قونو،بوتون آذربایجانیمیزین خالق شاعیرلرینه و یازارلارینا اوزه لیکله (هارای) جنابلارینا و موغان بولگه سینین گورکملی شاعیرلری (قوجا) و سخاوت قاسم زاده بی لرینه ایتحاف اولونور. 

    افشین قاسم زاده(هارای)،اوتوز بیر ایل بوندان اونجه،موغان بولگه سینین قوجا بی لی کندینده دونیایا گوز آچدی.تبریز اوخویوردونون،حئسابداری فاکولته سینده عالی تحصیلی نی باشا بیتیردی.او،ایندی موغان بولگه سین ده ن اوزاق یاشاسادا یئنه کونلو یوردونا و وطنینه باغلی دیر.

بئله بیر ضییالی شاعیر  گنج یاشلارینی یاواش - یاواش آرخادا قویسادا،هله ده کوکسونده ن هارای قوپاریر!خالقینی گورمک ،وطنی نی دورنالار تک حسرت ایله دولانماق اوچون،غربت الیندن هارای چکیر!ظالیم و یابانجی لارین قارشی سیندا دایانیر و گور سسی ایله،داغلارا هارای سالیر. اودلو قلمی ایله،مئشه لرین آصلانی اولور!اوستون ایشلریله کونوللره قوناق اولور.بئله بیر شاعیر تخلوصونو ده(هارای)  سئچیر.

دئمه لی شاعیرین گئنیش دونیاسی و خالقینا گوستره ن درین اینام و محببتی،اونو ائل شاعیری آدلاندیرا بیلیر!نییه کی شاعیرلر اوز دوشونجه لری ایله خالق ایچره یئر دوتورلار،و هابئله خالق لارینین یانیندا اوزلرینه اعتیبار قازانیرلار.منجه او،شاعیر کی،میللتینین آلقیشینی قازانا بیلمه سه!بئله بیر شاعیر،ایچی بوش آغاجا بنزه ییر!

ایندی (هارای) کیمی میللتینه آرخالانان و اونون کئشیینه دوران بیر شاعیر، خالقینین  ایستکلری و آماج لاری اوغروندا گئجه - گوندوز چالیشیر و قارنلیق داخمالارا ایشیق ساچیر.بونو آرخایین لیق لا دئیه بیلره م کی،او،موختلیف سیناق لاردان باشی اوجا چیخیر.منجه بئله بیر اینسان بخته ور بیر اینسان حساب اولور.

من ایسه (هارای) شاعیر حاقدا،یازمالی سوزلر چوخ اولسادا،هله بو قیسا  بیلدیریش له،گنج شاعیریمیزین "کونلوم" باشلیقلیغی قوشغوسونو گتیرمک له سوزومه سون قویورام.بونو آرتیرمالی یام کی،شاعیرین یاردیجیغلاری "هارای غربت الینده ن" اوزه ل وب صحیفه سینده یاییلیر.(هارای) شاعیره ،اوخوجولارینا اوستون باشاریلار دیله ییره م.

                                       ۱۳۸۸/۸/۵ ـ گونش ایلی(یاشیل)    

حسـرتیــن چکدیگیــــم،آی آنـــا یــوردوم

هــر زامــان هیجرینـده یانیبـدی کونلـــوم!

نیسگیللی اولای یین، سینه مــه چـوکـــور

سنسیــز وارلیغیمی دانیبــــدی کونلــــوم!

* * * * * * * * * * * * * **

منلیگیـــم سنـده دیـــر، آتمارام سنـــــی

دوغمادان – دوغماسان ساتمارام سنی

شیریــن ســن، آجی یا! قاتمــارام سنی

آنـــا لایـــلالاریـــن، آنیبــــدی کونلـــــوم!

* * * * * * * * * * * * * **  

"خان چوبان" یار گزیر "موغان"دا- "میل" ده

"سـارای" تک عصمتلی یاریــم وار ائلـــده

اوخونــور نغمــه سی هلـــه ده، دیلـــده

(هارای)-لی بیر حسرت قانیبدی کونلوم!

                                                           شئعر:(هارای)

                                                                          http://haraye.blogfa.com

 ملیکان شهرینده اوستاد شهریار آدینا قورولان شئعر فئستیوالینا،چوخلو شئعرلر و مقاله لر گونده ریلمیش دی.من ده اوز نووبه مده،بویوک و داهی اوستادیمیز اوستاد محمد حسین بهجت تبریزی(شهریار)-ین اولو روحونا بیر غزل ایتحاف ائتمیشدیم ،کی اونو،یئنی ده ن حورمتلی اوخویانلاریمیزین خاطیرینه چاتیریرام.البتته هله بو قورولتایا گوره یئنه یازمالی میز اولاجاق دیر! 

چیچـک لندی کونـول مولکو،اوخـور نغمـه سـوز اوستـادی

گـوروراعجـاز ائدیـر سوزلــر،ائدیــر تعظیــم اوز اوستـادی! 

اونـون دوزگـون دریـن عشقی"ثریـا"دیـرسـا،بیـل هـرنـه- 

دووشـور یالـوارمـاغـا،اووسـونلایـا بیلمیـر،قیـز اوستـادی! 

یقین بیل شئعر و عیرفان ایله فتح ائتسه،او،قاف داغین 

نهـایت ده قـویـور دالـدا،اوزونــده ن یــوز-یــوز اوستـادی!

یئنــه بـارلی آغـاج میثـلی اییــر اوز باشینی هــر گـــون 

نـه مغـرور اولـدو بیـر لحظـه،نه ده توتـدو پـوز اوستـادی!   

اوخـوردو هـر زامـان شئعـریـن،دولـوردو گـوزلــری یاشـلا 

یاخیردی سانکی بیر سئودا و عشق آدلی کوز اوستادی!  

ائلــه یوکسـک الهی روتبـه واردیـر هـانسی شاعیــرده! 

اونـو شاعیـر تانیـرسـاق تک!تانیمـادیــق دوز اوستـادی! 

آنـاسی اویـره دن دیلـده،یـازانـدان شئعرینی بیــل کی!

سیخیـر اوز باغرینـا جان تک،هممیشه تبریـز اوستـادی  

(یاشیل) سن ائتمه سن اوز خالقینا خیدمت،اولن چاغدا- 

بئش آرشین بئزده قییمازکی،سنه وئرسین بئز اوستادی!

                                           شئعر:عسگر علیائی کلیان(یاشیل) 

       ملیکان شهرینده اوستاد شهریار آدینا قورولان فئستیوال سبب اولدو ،بیر سیرا شاعیر یولداشلاریمیز ایله بو  فئستیوالین کناریندا گوروشوموز اولا!بو گوروشلرده موغان بولگه سینین اوچ پارلاق اولدوزو آدلانان شاعیر آرخاداشلاریم :حورمتلی یوسف گلدسته(قوجا) حضرتلری،بختیار علیمرادی(موغان اوغلو) بی و هابئله یاور مجرد جنابلاریلا یاخیندان گوروشدوک.عینی حالدا آشاغیدا یازیلان یازینی بو اوچ سئویملی مسلکداشلاریما سونورام.

        یایین آخیر آیی نین سون گونلری یدی،بیر گون ایسه موغان بولگه سینه یوللانیب،آراز چایی نین آرخاسیندا دایانمیشدیم.آراز چایی نین آخار سویو کونلومو خزر دنیزینه ساری چکیردی!قوزئی ده ن اسن یئل منه چاتاندا باشقا بیر حیس ویجودومو آلیردی و خیال قوشومو شیمالی آذربایجانین بوتون شهرلرینه،کندلرینه سوروردو!هابئله قوزئی ده بیر بالاجا قیز اوشاغی کوللاردان آستا - آستا گیلدیک ده ریردی.

گور سویون اورتامیزا حیصار اولماغی یندان علاوه،سیاسی سرحدلرین یارانماسی اوره ییمی سیخیردی!او،زامان بیر بئله حسرت ایله یاشادیغیمیزی یالنیز گوز یاشلاریمدا و دویغولاریمدا گوروردوم.

فیکره دالمیشدیم،گونش یاواش - یاواش باتی دا گوز اونونده ن ایتیردی،گونشین قیزارتی سی اوفوقده هله ده اوره ییمه اومود یارادییردی!من ایسه فیکر ائدیردیم گونش،بو گون باتیب و گوزلرده ن ایتسه ده و قارانلیق گئجه لر سکوت ایله برابر چوکسه ده،یئنه گلن گون یئنی ده ن دوغولوب و یوردوموزا ایشیق ساچاجاقدیر.آراز چای یندان ال چکه بیلمه ییردیم،کونلومو یالنیز سویا،تورپاغا تاپیشیرمیشدیم!دیگر طرفده ن بالاجا قیز اوشاغی نین گوزلریمین اونونده ن یاواش- یاواش ایتمه سی، منه چوخ آغیر گلیردی!ایچریمده آغلاماغیمی یانیمداکی یولداشلاریما بیلیندیره بیلمه ییر دیم!یولداشلاریم نئچه قدم منده ن گئری قایتمیشدیلار.من ایسه تک لیییمده گومانیم یالنیز گوزلریمده ن سوزولن گوز یاشلاریما گلیردی.

خیال ائدیردیم الیمده ایختیاریم اولسایدی،بوتون قوهوم لاریم و تورک سویداشلاریمی موغان دوزلرینده یئرلشدیریب و هر گون دونه - دونه اونلارا باش چکه ردیم!بیر آن یولداشلاریمین بیری چاغیردی:"یولداش یوبانما،گئجه یه قالاریق،ایندی هله بوردان اردبیل شهرینه نئچه ساعات لیق یول قالیبدیر!ائرته کن ده گره ک تهرانا ساری یولا دوشک!"

او،زامان بونو حیس ائدیردیم کی منی،یالنیز آراز چایی،خزر دنیزی،ساوالان داغی،قوزئی ده اسن یئل،گیلدیک کوللاری و هابئله او،بالاجا قیز اوشاغی باشا دوشور!اوچ آی بو حادیثه ده ن اوتن ده ن سونرا "آراز ساحیلی" باشلیقلی قوشغونو یازدیم.اوچ آی تامام بو اولایا فیکیرله شیردیم،ایچریمده کوزه رلنیب و آلیشیردیم!

او،واختلار منیم نئچه یولداشیم اردبیل،نمین و موغان بولگه لرینده اولسایدی دا،اوره ک یولداشلاریمی آراز چایی،خزر دنیزی،ساوالان داغی،قوزئی ده اسن یئل،گیلدیک کوللاری و او، بالاجا قیز اوشاغی،بیلیردیم!ایللر بویو اوتدو،موغان بولگه سی،حسره تده ن باشقا منه بیر شئی ده پای وئردی!اودا، اورییمده یارانان حسرت لر،سئوینجه چئوریلدی.یاواش - یاواش موغان بولگه سینین،آراز ساحیل لرینده یاشایان اوچ شاعیری،منیم ان یاخین یولداشلاریم اولدو و اونلار اوچ پارلاق اولدوزلاریم آدلاندیلار!

کئچمیش زامان دا بیر گنج اولسایدیم دا،ایندی گنج لیک دوورانینی آرخادا قویماقدایام. آمما هله ده گنج و اوشاقلیق چاغلاریمین ائحساس لاری منی اوزو ایله گزدیریرلر!صداقت ایله دئیه بیله ره م کی،چوخلو گئجه لریمی - گوندوزلریمی بو اوچ پارلاق اولدوز کیمی ایشیق ساچان شاعیر یولداشلاریما حصر ائتمیشه م!اونلاری گورمه ینده،اوره ک سوزلرینی ائشیتمه ینده،ائیله بیل بایقوش کیمی دار قفسده باغیریرام!آمما اونلارین عطیرینی دویاندا،اوره ک سوزلرینی دینله ینده،ائحساس آتیم ذیروه لره بویلانارکن،داغلاردان -داشلاردان آشیر،بولاق کیمی جوشورـداشیر،گئجه - گوندوز نغمه قوشور،بوز قوردلار کیمی اوولاشیر!و هابئله قوجا موعللیم دئمیش کن:"موغانا جیران ماهنی سینی" اوخویور!موغان اوغلو بختیارین،آی ساوالان پوئماسینی دیللر ازبری ائدیر.یاور مجردین وولقانا بنزه یه ن غزللرینی کوکسونده ن پوسکورور!...........!!

           یازار:عسگر علیائی کلیان(یاشیل)  ـ ۱۷/۰۷/۱۳۸۸ گونش ایلی    

      اورمو گولونون آرخاسیندا یئرله شن شهرلر و کندلر اوزلریله اوزه ل و گوزه ل بیر طبیعت،دوغال کولتوره ل،تاریخی آبیده لر و هابئله ضییالی،ایستی قانلی، دویغولو،  دوشونجه لی،ادبلی و محببتلی اینسانلار بسله میش لر.من،بونو ایللر بویو بوندان اونجه دویسام دا، اوتن گونلر،یاخین دان حیس ائتدیم.

دئمه لی،اوستاد شهریار آدینا،بیرینجی ادبی قورولتای،آذربایجانیمیزین ملیکان شهرینده،زنگین و ان گوزه ل بیر قورولتایا چئوریلدی.

تهران،تبریز،اورمو،اردبیل،زنگان،ماراغا،میانا،موغان،خیاو،هئریس،توفارقان،بوستان آوا، کرج،شهریار،قوم،ساوا،قوشاچای،بیناب،عجب شیر،هئشتری،سلماس و هابئله ملیکان شهرینده ن چوخلو ادیب،شاعیر،یازیچی،تدقیقاتچی و ادبییات ماراقلایانلاری بو قورولتایا قاتیلمیشلار.بو قورولتای ۱۳۸۸ نجی گونش ایلینین خزل آیی نین اونوندا ملیکان شهرینین ارشاد اداره سینین ساراییندا کئچیریلدی.قورولتای اوستاد شهریار آدلی درنگین و ملیکان ارشاد اداره سینین تشببوثو ایله و هابئله شهر شوراسی و بلدیه اداره سی نین یاردیمی ایله یوکسک سویه ده قورولدو.

بو قورولتای دا چوخلو شاعیرلر،یازارلار و ادبیات تدقیقاتچی لاری و ساز اوستادلاری چیخیش ائتدیلر.اورمو شهرینین دونیا شهرتی قازانمیش اوزانی "آشیق دهقان" سئحیرلی سسی و اینجه صنعتی ایله قورولتایا شنلیک پای گتیردیلر.قوشاچای لی "آشیق باهار" دا گوزه ل و اوره یه یاتان نغمه لریله کونوللری اوخشادیلار.ملیکان شهرینین گنج اوزانی "آشیق علسگر" ده گویجه لی رحمتلی "دده علسگر" ـ ین آدینی یئنی دن  دیلر ازبری ائتدیلر.

شاعیرلر نئچه بولومده، اوز هونرلرینی خالقیمیزا گوستردیلر.موغان بولگه سینین پارلاق اولدوزلاری(قوجا موعللیم،بختیار علیمرادی،ساوالان قیزی و ...) گوزه ل و مضمونلو شئعرلریله قورولتایا جان باغیشلادیلار.بویوک و ضییالی تورک عالیمی دوقتور"گونئیلی" جنابلاری دا درین مقاله سی ایله اوستاد شهریارین خالقی ایله اولدوغو صمیمیت و هابئله کوتله وی آنلاملاردان ایستیفاده ائتمه سینی یوکسک سویه ده آچیقلادیلار.

تبریز شهرینده ن ایشتیراک ائده ن شاعیرلر،شئعرلریله هامی نی حئیرته دالدیلار. گورکملی "اولکر" خانیم پست مدرنیزم شئعریله قورولتایدا اوچونجو یئر توتدولار.ماراغا شهرینده یاشایان دوشونجه لی شاعیرلریمیز،شیدا نونهال(خزر)خانیم و باراز موعللیم ده یئتگین و دولغون شئعرلریله قورولتایی زنگین ائتدیلر.زنگان شهرینین دونیا گورموش شاعیره سی آیلار خانیم دا درین شئعرلریله اوره کلری واله ائتدیلر.ساوا شهرینین تانینمیش شاعیری "فتح اللهی" جنابلاری اوزه ل و رمانتیک شئعرلریله مجلیسه دویغو یاراتدیلار.اورمونون چیخارلی شاعیری "کریم گل اندام" حضرتلری ادبیات اوزره دانیشیق آپاریب و حئمکتلی سربست شئعرلر اوخودولار.

اوستاد شهریارین سئوگیلی یادیگاری، سایین "هادی" بی،درین چیخیشی ایله اوستاد شهریارین خاطیره سینی یادداشلاریمیزدا دیریلتدیلر.

داورلر هئیه تینین عوضولرینده ن اولان ،گورکملی تدقیقاتچی و شاعیریمیز سایین "حیدر بیات" جنابلاری،درین معلوماتلار، ایشتیراک ائدنلره وئردیلر و آردیندا بیر پست مدرنیزم شئعریله سوزلرینه سون قویدولار.تانینمیش شاعیر "رسول یونان" شئعرلرین سئچیلمه یی باره ده داورلر هئیه تینین طرفینده ن اوره یه یاتان بیلدیریش وئردیلر. باشقا داورلر هئیه تینین عوضولری،سایین "صبحدل"،"درگاهی" و "همت شهبازی" جنابلاری چئشیدلی چیخیش لاریلا بو قورولتایا گونده ریله ن شئعرلر قونوسوندا بیلدیریش سویله دیلر.

ملیکان شهرینین گورکملی مسئوللاری،اینصاف ایله دئسه ک،یاخشی ایستیقبال ائتدیلر و اوز اوره ک سوزلریله قورولتایین آلقیشینی قازاندیلار.

حورمتلی یولداشلاریمیز،"فرج زاده" و "مهرعلی علیپور" جنابلاری دا اوزه ل چیخیش ائتدیلر.دئمه لی بو ایکی ضییالی شاعیر ملیکان شهرینین شهریار آدلی درنگینین تاثیرلی عوضلرینده ن اولموشلار.

خالقیمیزین سارسیلماز اراده سی ساییلان سایین "مهدی نعیمی" جنابلاری، شهریار شوناسلیق کلاسلارینی موفقییت له سون قویدوغونا گوره،اوزه ل اودول قازاندیلار. 

فئستیوالدا یئر توتان آلتی سئچیلمیش اثرلرین یارادانلاری بونلاردان عیبارتدیرلر:

۱- ائلیاد موسوی سلماس شهرینده ن

۲-سولماز محمدزاده(ساوالان قیزی) خیاو شهرینده ن

۳-منیره اکبرپوران(اولکر اوجقار)،تبریز شهرینده ن

۴- زمان پاشازاده خیاو شهرینده ن

۵- محمد نوین(باراز)غزل شاعیری،ماراغا شهرینده ن

۶ـ قادر جعفری موغان بولگه سینده ن 

آشاغیدا توخونان مووضوع لاری دا،گوزده ن قاچیرمامالی ییق!:

ـ قورولتای یوکسک سویه ده قورولدو و چوخلو تورکی شئعرلر اودول قازاندیلار.

ـ فارسجا ایکی غزل ده بو قورولتایدا اودل آلدیلار.

ـیئنی و پست مدرنیزم شئعر داورلر هئیه تینین طرفینده ن قارشی لانمیش و غزل ایله هیجایی شئعر اوزنه یئر تاپانمامیش دی!

ـ اوستاد شهریارین اوزونه عایید اولان شئعرلر ده چوخ آز ایدی!

ـ برنامه نین آپاریجی سی تبریز شهرینده ن گلمیش ایدی و ادبی تورکی دیلینی یاخشی بیلیردی.او،گوزه ل سسی ایله قورولتایا آرخا اولموشدو.

ـ برنامه نین آپاریجی سی،باشقا شاعیرلرده ن ده شئعر اوخویوردو.

ـبوتون شاعیر و یازیچی لار و باشقا ایشتیراک ائده نلر سوزلرینی سویله ییب و شئعرلرینی اوخودولار.آمما بیر نئچه اوزاق یولدان گلمیش شاعیرلرین حتتا آدلاری دا بیر کره تشککور ائتمک اوچون چکیلمه دی!

ـ ملیکان شهرینین ایلک بولواریندا بوتون تورک ادیب شاعیرلرین هئیکللری تیکیلمیش دیر.بئله بیر اونملی ایش یالنیز ملیکان شهرینه عاییددیر.

ـ قورولتای باشلانان زامانلارین سون واختینا دک بیر بالاجا قیز اوشاغی آذربایجانین میللی گئییمیله،سئن ده حضور تاپدیلار.

ـ گورمه لی او زامان اولدو کی قورولتای دا ایشتیراک ائده ن قوجامان و شوهرتلی اوزان،ملیکان شهرینین،ایمام جومعه سی ایله اوپوشدولر!

ـ ملیکان شهرینین مسئوللاری خالقیمیزا آرخالانمیش و عمل لریله بونو ثبوت ائتدیلر. اونلار بوتون اوزاق دان ـ یاخیندان گلن قوناقلارا،نهایت ایله حورمت ائتدیلر.

             کرج شهری ـ ع.علیائی کلیان(یاشیل) ـ۱۲/۰۷/۱۳۸۸ گونش ایلی

حورمتلی یولداشلار،بو قونونو تکمیل لشدیرمک اوچون، ده یرلی اونرلرینیزه گوز دیکمیشم.قورولتایا گونده ریلن شئعرلر گلن قونولاردا یازیلاجاقدیر.

فئستیوالا باغلی اولان باشقا یازیلار:

                               " کونول ذیروه سی"                                     

    بو دویغوسل قیسا مطلبی،عشق ایله خیاو بولگه سینده ن ملیکان شهرینه تشریف گتیره ن قوجامان یازار و شاعیریمیز سایین"اثنی عشری" جنابلارینا ایتحاف ائدیره م. 

        قوجا کیشی نین گوزله رینده ن هر نه یی دویماق اولوردو،او،یالنیز اوزو ایله بیر سینه لیک سوز گتیرمیش دی!اونون حئیران باخیش لاری،کووره ک کونوللری اویوردو!ساکیت یئریشی،آستاجا ترپه نیشی،مئهریبان باخیشی هر بیر ویجدانلی اینسانا خوش گلیردی.او،موغان بولگه سینین خیاو شهرینده ن،ملیکان شهرینه اوز گتیرمیش دی،اولسون کی اوردا،اوره ک سوزلرینی ماوی گویلرده آختاردیغی،آمما یئرده تاپدیغی شاعیر و یازیچی یولداشلارینا سویله یه بیلسین!

او،"آذربایجان تاریخی" آدلی قالین حجم لی کیتابینی اوزو ایله گزدیریردی.بیلمیره م یازیق قوجا نه قده ر واخت بئله بیر حجم لی کیتابین یازیلماسینا صرف ائتمیش دی. نه بیلیم،اونون طالعی ده اوزو کیمی قوجالمیش دی!اونون آستا یئریشی،قوجامان خالق شاعیری "بالاش آذر اوغلو" - نون یئریشینه بنزه ییردی.

فئستیوال سونا چاتمیش دی،قوجا کیشی نی میکروفون آرخاسینا سس له ین اولمامیشدی.سون واخت لارا دک، قوجا تک قالیب،داهادا بئزیکمیش دی!موغان بولگه سینین باشقا شاعیرلری اولماسایدی،اونو،بیرده کیمسه دانیشدیراجاق ایدی!اونون،سئحیرلی اوره ک سیررینی کیم آچاجاق ایدی!کونلونو کیم آلاجاق ایدی!آخی بویونا کیم اوخشایاجاق ایدی!اونو،ایستیقبال ائده ن کیم اولاجاق ایدی!

نه بیلیم،بلکه دونیا گورموش و اوزونه زمانه توزو قونموش و آلنی قیریشلانمیش آغ  ـ بیرچک بیر قادین لئچه یینه بورونرکن،اونو،قارشی لایاجاق ایدی!

یوخسادا سسسیز ـ سمیرسیز بیر داخما و یالنیز کرپیچ دیوارلار سکوت ایچره اونا قولاق یولداشی اولاجاق ایدی!!شاید قوجا کیشی نین کووره ک کونلو ساوالان ایله سهند داغلارینیین ذیروه لرینه یول آچاجاق ایدی!یوخسادا خیال گویرچینی ایله طالئعینین کوسوب و آزغین دوشن کووشن لرینی دونه ـ دونه آختاراجاق ایدی!یوخسادا قوجا کیشی،ابدی بیر حیاتا یول تاپاجاق ایدی.............................!!

                                        یازار:عسگر علیائی کلیان(یاشیل)

                                  کرج شهری ـ آخشام چاغی ـ۱۴/۰۷/۱۳۸۸

    داریخارام سحر چاغی قارا دومان -

             وطنیمین داغلارینا چوکن زامان!

                    کاریخارام،گوزلریمین قارشی سیندا -

                                   ناحاق یئره آغیزلاری تیکن زامان.

      آه چکره م! حسرتیله عزیز آنا،

                  گوزلرینی جیغیرلارا دیکن زامان!

                                    کدرلننم قارداشینین فراغیندا،

                                     یازیق باجی گوز یاشینی توکن زامان.

      آغلایارام،

             اوغول دردی شیمشاد کیمی آتا بیلین -

                           آغیرلاییب بوکن زامان.

                                       اولارام بیر نیسگیل داغی،

                                                 مرد ایگیتلر دوستاقلاردا -

                                                        ائل دردیله چوکن زامان!

      آلیشارام،تارلالارین حاصیلینی،

                قارانلیقدا زیل دونقوزلار سوکن زامان!

                          سئوینه ره م یئنه بیر گون (یاشیل) توخوم ـ

                                                   آذربایجان تورپاغینا اکن زامان!

                                                                              شئعر:(یاشیل)

   چالیشقان شاعیریمیز، رحمتلی محسن بحر بگی(یانار) آرخاداشیمیزین نیسگیللی دونیا ده ییشمه سی قیرخ گون اولدو!البتته بو ایتگی یانار موعللیم ین عاییله عوضولرینه و هابئله اونون ادیب یولداشلارینا آغیر بیر ضایعه دیر.نییه کی،اونون عاییله سی و اوزه لیکله هادی بی،باشی کسیک گویرچین کیمی اوزونو اودا - کوزه آتدی!السون کی مئهریبان آتاسینین عطرینی، یانار چیراغین شاعیر و ادیب یولداشلاریندان دویسون.بئله بیر یانیقلی و یانقیلی آختاریشی من،هادی بی یین یازیلاریندا گوردوم.آمما حزین ـ حزین آغلاسام دا دیله گتیره بیلمه دیم!

یانار قارداشیمیزین نیسگیللی اولومونه قارشی، اونون شاعیر و ادیب یولداشلاری چئشیدلی سایت و سیته لرده  اوزه ل قوشغولاری ایله و یازیلاریلا طنطنه لی یاس ساخلادیلار. او جومله:ده یرلی و ائحساسلی شاعیر و یازیچی قلمداشیمیز (توتقون)بی،(چنگی)جنابلاری،(قوجا)موعللیم،(یاور)بی و ... اوره ک سوزلرینی گورکملی سویله دیلر.

ایندی یانار قارداشیمیزین اولدوزلار کیمی آخیب و جیسمی گوزلریمیزین اونونده ن ایتمه یی قیرخ گونه چاتدی.اونون موحترم و ضییالی عاییله سی اوزه ل بیر مراسیم قویدولار.دئمه لی یانار آرخاداشیمیزین ان یاخین و سئوگیلی دوستو (توتقون) بی گوزه ل بیر قوشغو و ده یرلی بیر مقاله یازدیلار.

          رحمتلی <<صمد وورغون >> ـ ون شئعرینه اوزومده ن بیر تضمین

                                                  <<دئمه سوسدو روبابیمین تئللری

                                                   هر پرده ده بیر نواسی وار اونون>>

اینجـــه روحــــوم قانــــاد چالیب،اوچســـا دا!

ظــولــم الینــــده ن نـالـه چکیب قاچســـا دا!

اولــــــــدوزلاردا اوزونــــــه یئــــــر آچســـا دا!

<<وطـن آدلـی بیــر یـوواسی وار اونـون>>

مـلکـلــــریــــن قــانــــادینــــــا مینســـــه ده

هـــــاوالانـیـب اوزایـــــــلاردا ائـنـســــــه ده!

عـلاقــه سی بـو کـــوره ده ن دونســــه ده

مجنـــون کیمــی بیــر لئیـلاسی وار اونـون!

آغیـــر بیــــر درد ویـجـــودونـــــو آلســــا دا!

(یاشیل) طبعی هئی سارالیب سولسا دا

یالقیـــز اولــوب یـولــونــــدا تـک قالســا دا!

بیـر سوزونون میــن صــداسی وار اونـــون!

                                                      شئعر:(یاشیل)

گیریش:

بیلدییینیزه گوره تورک دیلی،موختلیف لهجه لرده ن یارانیب دیر.عینی حالدا اوتوز دان علاوه اولان باشقا دانیشیق و ادبی لهجه لر بو ساحه ده اینکیشاف ائدیر.تورکی دیلینین ان چئشیدلی لهجه لریندن بیری ده اوزبک تورکجه سی دیر.اوزبک تورکجه سی "اوزبکیستان" اولکه سینده ن علاوه "افغانیستان" ـ ین قوزئی و اورتا بولگه لرینده اوزه لیکله:"فاریاب"،"بلخ"،"جوزجان" و ... ولایت لرینده اهالی نین اکثریت دیلی ساییلیر.

ایندی سککیز میلیون دان آرتیق تورک دیلداشلاریمیز "افغانیستان" اولکه سینده یاشاییرلار.اونلارین اکثریتی اوزبک تورکلری دیر."افغانیستان" دا یاشایان اوزبک تورکلری اوزلرینه اولان اوزه ل یازی قایدالاری ایله ادبی ساحه لرده چیخیش ائدیرلر.

دئمه لی "طالیب" ـ لر حاکیمییتینده ن سونرا "افغانیستان" دا حاکیم اولان شرایط ده ن آسیلی اوزبک تورکجه سی بو اولکه نین اوچونجو میللی دیلی،حاکمییت طرفینده ن نظره آلیندی.بو اولکه نین موختلیف بیلیم یورد(اوخو یورد) لاریندا ها بئله "بلخ " و "فاریاب" بیلیم یوردلاریندا اوزبک تورکجه سی آکادئمیک سویه ده اوزنه یئر آچدی.

اونلارین ایندی دانیشیق لهجه لری "اوزبکیستان"دا یاشایان تورکلرین دانیشیق لهجه لری ایله بیر آز فرقلی اولسا دا ، آمما ادبی ساحه ده "اوزبکیستان"دا اولان یازی قایدالاری عمومییتله "افغانیستان" اوزبک تورکلری اوزره رعایت اولونور.دئمه لی ایندی "گونئی تورکیستان"دا ایشله نیله ن یازی قایدالاری "اوزبکیستان"دا ایره لی سورولن یازی قایدالاری ایله هیچ فرقی یوخدور.آنجاق "افغانیستان"  تورکلری ایچره عرب کوکلو الیفبا دان قوللانیلیر،آمما "اوزبکیستان"دا ایشله نیله ن الیفبا،لاتین الیفباسی دیر.

اوزه للیکله ایندی "افغانیستان" ـ ین موختلیف عالیم،تدقیقاتچی،یازار،شاعیر و ژورنالیست لری  واسیطه سی ایله چئشیدلی اثرلر ایشیق اوزو گورموش و یوخسادا یاییلماغا حاضیرلانمیش لار.اینترنت اوزره گورکملی سایت لار و سیته لر بو ده یرلی عالیم،یازار  شاعیر و ادبییات ماراقلی لارینین توسط ایله یارانمیش و "افغانیستان"دا یاشایان اوزبک تورکلرینین دونیا تورکلری ایله ایلگی باغلاماغین دا ، ان مهم تاثیر بوراخ میش لار.

"افغانیستان"دا گئده ن اوزبک تورکجه سی ساحه سینده عئلمی و ادبی اینکیشاف اونلارین گورکملی عالیم،تدقیقاتچی،یازار و شاعیرلرینه باغلی دیر.بونلاردان شهرتلی اوستادیمیز پروفئسور"محمد عالیم لبیب" ده ن آد چکمک اولار.

بو باشلانغیجین آردیندا بیر قیسا  بیوقئرافی اوستاد "محمد عالیم لبیب" ده ن    گتیرمک ایله،بوتون اوزبک تورکجه سینین ضییالی عالیم لرینه، ها بئله بو قیسا بیوقئرافی نین حاضیرلاماغیندا الیم ده ن دوتان حورمتلی عالیم و شاعیر دیلداشیمیز اوستاد "همایون خیری" حضرتلرینه تشککورلریمی بیلدیریره م.  

نئچه گون اولماماغیمدان باغلی، آجی بیر اولایی بیر نئچه گون گئج دویدوم.آمما بو آغیر ضاییعه عزیز و ایستکلی شاعیر و یازار یولداشیمیز محسن بحر بگی(یانار) جنابلاری نین واخت سیز دونیادان کوچمه سی ایدی.

من "یانار " شاعیر ایله اینترنئت اوزره تانیش اولموشدوم!آنجاق اونو،اوزومه ان یاخین بیر مسلکداش بیلردیم.اونون سئویملی دونیاسی بیزه ده گوزه ل گله ردی."یانار" شاعیر ایله تانیشلیغیم منی هممیشه دویغولاندیراردی!

اونون، اینترنئت ساحه سینده ده یرلی ادبی فعالییتی، جنوب ادبییاتیندا تقدیره لایق ایدی.او،اجتماعی و سیاسی اولای لارلا قارشی، اوستون چیخیش ائده ردی."یانار" قلم داشیمیزین "یانار" عونوانلی وب صحیفه سینده "دوغو تورکیستان" ایله باغلی "اویغور " تورکلرینه گئده ن ناحاقسیزلیق لاری یئرلی اولاراق قلمه آلیب و اوندان اوستون سویه ده مودافیعه ائتمیش ایدی.دئمه لی بو یازی و گوستردییی گورونتولر اونون آخیرینجی یازیلاریندان عیبارت دیر.

رحمتلی محسن بحر بگی( "یانار"تخلوصو ایله تانینان شاعیر)، ۱۳۸۸ نجی گونش ایلینین مرداد آیی نین ایگیرمی سینده بئیین خسته لییی ایله دونیاسینی ده ییشدی.اونون ان یاخین سیرداش لاریندان اولان شاعیر و یازار حورمتلی "توتقون " بی، نئچه گون بوندان اونجه "یانار" حضرتلری نین آغیر خسته لییه معروض قالدیغیندان سوز گتیرمیش دی.دئمه لی اونون منه و باشقا یولداشلارا یازدیغی گوزه ل و اوره یه یاتان پیغام لاری دا، اونون ایچری سی نین آری- دورو اولدوغونو گوستریردی.اونون پیغام لاریندان اولاراق بیر نئچه سینی "آلقیش" سیته سینده ن اورنک گتیرمک له، بئله بیر ضییالی عالیم و اینسان سئور قلمداشیمیزین دونیا ده ییشمه سینی تسلییت دئیه رکن، قالانلارا باش ساغلیغی دیله ییریک.

حکیم"تیلیم خان" قونولاریندا ایکی پیغام موختلیف تاریخ لرده "یانار" موعللیم ین الیله کامئنت لرده یازیلمیش کی بوندان عیبارت دیر:

نویسنده: "یانار"

دوشنبه 29 تیر1388 ساعت: 23:53

حرمتلی "یاشیل" بی جنابلاری

حکیم تئلییم خان قورولتایینین نئجه کئچدیگینی وئبینیزه گتیردیگینیزه گؤره سیزده ن منتدارام اومورام ائلین اولو شخصیتلرین تانیتدیرماقدا بونداندا چوخ چالیشقان و باجاریقلی اولاسینیز اللر وار سیزلره اییی نائلییتلر آرزولاییرام.

یاشیل:حورمتلی یازار و شاعیر یولداشیم "یانار" موعللیم.سیزدن ده اونرلرینیز اوچون میننتدارام.

وب سایت

 

 

 

یازی لاردان بللی دیر کی اونون دوستلاریلا ایلگی قورماغی و هابئله تئر - تئز اونلار ایله دانیشماغی و ده یرلی اویود و اونرلری، بوتون یولداشلاری ایچره مارقلا قارشی لاناردی.او جور کی گورونور، "یانار" قلمداش و مسلکداشیمیز، اون ایکی گون دونیاسینی ده ییشمه میش ده ن اونجه، کونوللری اوخشایان بیر پیغام ایله بیزده ن یاد ائتمیش دی.نه بیلیم! یوخسادا شاعیر "چنگی " دئمیشکن: او، بیلیرمیش تئزلی یولداشلاریندان و آنا وطنین ده ن آیریلاجاق می؟!کی داغلارلا ویداعلاشیرمیش و یولداشلاریلا تئز- تئز گوروشورموش!!

 

 

ایندی سئویملی دوستوموز،ووقارلی یازار وشاعیریمیز،ایستکلی قلمداشیمیز،ائحساسلی و درین دوشونجه لی ضییالی بیر مسلکداشیمیز  بو دونیادان کوچسه ده ،اونون دوستلاریلا باغلادیغی ایلگی لر قیریلماییب و انون ادبی،کولتوره ل و توپلومسال ساحه لرده ائتدییی چیخیش لار و یازدیغی اثرلر ایللر بویو یاشایاجاقدیر.

 

تاسوفله هئچ بیلمیردیم "یانار " و " گوزگو " وب صحیفه لرینده حئیرت ایله "محسن" قارداشیمین اینانیلماز و واخت سیز اولومونو "توتقون" بی ایله، او،رحمتلی نین عاییله سینه صبیر دیله یه جه یم!یوخسادا دویونجا حزین - حزین آغلایاجاغام و بئله بیر شاعیر دوستوموزون نیسگیلی دونیادان گئتمه سینی هارایلایاجاغام!کامئنت لرده قویدوغوم سوزجوکلری بیرده گتیرمک له سوزومه سون قویورام.

 

 

 

نویسنده:" یاشیل" دوشنبه 26 مرداد1388 ساعت: 11:36

              "آغلار هئی"!!
اوره ییمین پارچا-پارچا یاراسین
"توتقون" ایله شاعیر دوستلار باغلار هئی!!
یامان گونده "یانار" چیراق اولسام دا!
قبریم اوسته گلن دوستلار آغلار هئی!!

بیلیره م کی اونودولماز سوزلریم
جیغیرلاردا یول گوسترر ایزلریم
قارانلیقدا گونش دوغان گوزلریم!
-دویغولاریم چشمه کیمی چاغلار هئی!!
                                      ... چاغلار هئی!!
                                                   ... چاغلار هئی!!


"تانری باغیشلایاندیر"
حورمتلی و سئوگیلی قارداشیم "توتقون " بی
نئچه گون اولماماغیمدان آسیلی اوره ک بندیمیز ساییلان "یانار" موعللیم -ین واخت سیز دونیادان کوچمه سی، منی ده سارسیلتدی.نییه کی ائل اوغلو "یانار" حضرتلری سیزین کیمی ووقارلی،دویغولو،درین دوشونجه لی و ضییالی مفکوره لی بیر اینسان ایدی.
اونون قلمی هممیشه عدالتسیزلییه قارشی جبهه دوتاردی."یانار" مسلکداشیمیزین آخرینجی قونوسو "اویغور" تورکلرینه گئده ن عدالت سیزلیک لرده ن سوز آچمیشدی!اونون اومانیستی باخیش لاریندا اولان اینسان سئورلیک اوستون بیر یئر دوتموشدور.
بو آغیر اولایی اوره کده ن تسلییت دئمک له، بوتون قالانلارا،او جومله دن :حورمتلی "یانار" قارداشیمیزین موحتره م عاییله سینه و اوزه لیکله سیزه اولو تانریمیزدان صبیر دیله ییره م. روحو شاد و قبرینه ایشیق ساچسین اینشاالله.
درین حورمتلرله "یاشیل"

ایضاح:نه بیلیم من بو باش ساغلیغی نی "یانار " قارداشیمیزین ان یاخین مسلکداشی "توتقون " بی یین "گوزگو" عونوانلی سیته سینده یازمیشدیم.آنجاق منیم محسن بهر بیگی "یانار " موعللیم ایله تانیشلیغیم قیسا زامان اوزره اینترنت واسیطه سیله اولسا دا اونو اوزومه ان یاخین یولداش بیله ردیم.نییه کی او، ادیب و شاعیر یولداشلارینین ایچینده محببتلی و ایستی قانلی بیر یولداش تانینیردی.اونون منه دونه - دونه باش چکدییی و قویدوغو "پیغام لار ایندی "آلقیش " وب صحیفه سینی بزه ییبدیر.منجه یولداشلارین هیممت ایله گورکملی اولار کی اونون یولداشلارینا قویدوغو کامئنت لر و هابئله یولداشلارینین اونا یازدیغی پیغام لار اوزه لیکله "یانار" وب صحیفه سینده گتیریلسین.

یئنه ده روحونو صلوات ایله یاد ائده رکن قالانلارا جان ساغلیغی آرزولاییرام.

 

 

گتیردییمیز مطلبین داوامیندا رحمتلی محسن بحر بیگی "یانار" قلمداشیمیزین ایستکلی شاعیر یولداشلاری و هابئله اونون چیخارلی ائولادی "هادی "بی گوزه ل و یئرلی پیغام لاریندا ده یرلی سوزلر یازمیش و دویغولو شئعرلر گتیرمیشلر.ائشیتدییمیزه گوره "یانار" موعللیم ین دورد اوغلو ،اونون گورکملی ایزله یه ن لرینده ن اولموش و بعضن قلم صاحیب لرینده ن ساییلیرلار.بئله بیر ایتیفاق کونول یارالاریمیزی بیر قده ر توختاداجاقدیر اینشاالله!

سئویملی ائولادیمیز ساییلان "هادی " بی یین و ها بئله باشقا گورکملی شاعیر و یازار دوستلاریمیزین سوزلرینده ن و دویغولو شئعرلرینده ن بو مطلبین ادامه سینده فایدالانیریق:  

 

یازان: هادی

سه شنبه 27 مرداد1388 ساعت: 16:21

محترم "یاشیل" به ی جنابلاری!
سیزده ن نهایت منت دارلیغیمی بیلدیرمک ایستیرم. ده ده مین واختسیز دونیاسینی دیشدیرمگی هامیمیزی سارسیلتدی. اما آنجاق بیرجه فاکت واردیرکی منیم اوره گیمی آز دا اولسا تسکین وئریر

. اودا بودور کی، او رحمتلیک همه شه یولونون داوامینی ائولادلاری گئدمسی اوچون، چاباگوستریردی. تانریا شکر اولسون کی هر 4 اوغلو اونون قلمینی اله آلماق اوچون، صبرسیزلنیرلر.
سیزده ن ودیه رلی و حورمتلی یازیچی و شاعیر دوستلاریندان دا، نهایت تشکر و منت دارلیقیمی بیلدیرمک ایستییرم.

 

 

 

موحتشم شاعیریمیز حورمتلی "قوجا" حضرتلری ده بئله یازیر و اوز قوشغو لاریندان سویلمه ک له "یانار" قارداشیمیزین شئعرلرینده ن ده بیر نئچه بندینی آچیقلاییر :

 

نویسنده: قوجا

سه شنبه 27 مرداد1388 ساعت: 23:32

سالام یاشیل قارداش/
سیزین بوتون تودوغونوز ایش هممشه دوشرگه نیزین آدینا باغلی (( آلقیش)) - - آلقیشا لایق دیر.
" یانار" موعللیمین خاطره سینه عنوانلادیغینیز سؤز چلنگی منجه خیال چلنگی یوخ، اورئینیزده ن گله ن و اونا باغلادیغینیز درین حورمت و قایغی کش لیک چلنگی دیر. مرحوم "یانار" موعللیم شام کیمی یاندی؛ یاشادی.. باخ اوزوده بئله یاشادی//

// بير انسان تك بوغوب دردي كدري
//سورودونسه!‌ ياشاميسان دنيادا!!
//ائل دردينه شام تك ، يانيب سونا جاق
//اريدينسه ياشاميسان دنيادا!! 

اونون بوتون یازیلاریندان بئله گلیر :

 

 قادانین و خاطانین اوزونه دیک باخان اصیل شاعیر اولوب. حیاتین آغیر یوللاریندا بودره مه ئییب//
//شاعر قارداش مين خاطا وار مين قادا
//آتدان ساليب فلك قويسا پيادا !!
//سورونمه دين!؟ بودره مه دين!؟قايادا !!
//يئريدينسه !؟ ياشاميسان دنيادا !! 

......... اولو تانریدان بوتون ایستکلی دوسلارین طرفینده ن "یانار"ین محترم عایله سینه صبر دیله ئییریک. مزاری نورلا دولسون./

 

 

 

 

ایللر بویو "یانار" موعللیم ایله امکداشلیق ائده ن آرخاداشیمیز "توتقون " بی ده بئله سویله ییر:

 

نویسنده: توتقون

چهارشنبه 28 مرداد1388 ساعت: 8:59

بیــر اینسان کـؤچنـــــــــــده دونیــــادان اگر
سن، ائله بیلمه کی ، تک بیــر جان گئـدیـر
هـرسؤنن بـاخیشدا سایسیـــز دیله‌کلــــــر
هرکیچیک تابـوتــــدا، بیـــــــر جهان گئــدیـر

بـوداق قان یـاش تـؤکر، آغاج قان آغلار
بیـرکیچیک بـوداغی قیـرانــدا طــــوفان
بیـــردورنـا آیــریلسا، اؤزقاطارینـــــدان
قاطار منزیله دک گئـــــــــده‌ر پـریشان

گؤرکملی ادیب و درین دویغولو شاعیر " یاشیل"جنابلاریندان، رحمتلیک "یانار"معلمین آیریلیغی مناسیبتی ایله دؤنه ـ دؤنه وئردیی توختاقلیقلار و سیزلادیغی اوره‎ک سؤزلری،هابئله اؤلمز شاعیریمیزین ادبی گؤروشلری و"یانار"سیته سینده گلن بارلی مطالب‎لر ساحه‎ده وورغولادیغی اؤنملی یازغییاگؤره اؤز منت دارلیغیمی بیلدیریب، اونلارا و یانارین آیریلیغیندا بوتون سیزلایان کؤوره‎ک اوره‎ک دوستلارا جان ساغلیغی دیله‎ییره‎م./

 

 

 

موغان بولگه سینده یاشایان شاعیر مسلکداشیمیز "یاور مجرد" جنابلاری دا بیله دئییر:

 

نویسنده: یاور مجرد

چهارشنبه 28 مرداد1388 ساعت: 21:47

( گئج ده اولسا، دوستلاريمين واسطه سيله خبر دوتدوغوم آغير بير ايتگي مني ده باشقا قلم داشلاريم، كيمي! كدرلنديردي و منده موغان اولكه سينده اولان بوتون ادبيات سئوه ردوستلاريمين طرفينده ن بويوك استاديميز" يانار‌" موعلليمين ايسته گ لي دوستلارينا؛ خصوصي اولاراق عايله سينه باش ساغليغي وئريب و بو قطعه شعري تسلي اولاراق ايتحاف ائديره م.روحو شاد اولسون- مزاري نورلا دولسون.))
( حورمتله – ياورمجرد )

               ...الدوز سایاغی

"يانار" اولدوز ساياغي آخدي گويون ايچره سوؤزه
بو خبرده ن اورئييم، سيزلادي جان وئردي سؤزه!

قويدو اوز اولكه سينين، باغري قارا لاله لرين . . .
اوچدو جننت باغينا، حور و پري لرله گـــــــــزه!

او چيچگ اوسته قونان، بيرشئهه بنزه ردي!هاراي
دوشدو توپراقلارا تئز، قاره گئينديردي بيـــــــــزه!

ياندي حسرتله كوكونده ن، سارالان وارليغيميـــــز
يام-ياشيل چاغلاريميز، گونلريميز گه لدي گــوزه!

هلــــه آيديـــن سحــري گوزلريميز، حاخلاماميش
قالادي تونقالي، غــــم!، كونلوموزو سالدي كؤزه!

سپدي چارپاز يارانين،اوستونه، دوز، قانلـــي فلك
هانسي داغ-داش تاپيلار!؟ قاتلاشا بو، درده دوزه!

آيرليق حســرتيمين؛ داشدان هورولموش قالاســـي
يئنه بايقوش نفسين، سالدي آمان!!! اولكه ميزه!

" ياور " ين نغمه لري اوخشامادان، آلــدي مـايـا
آغي كوكسون دالادي، نيسگيل اولوب، چيخدي اوزه!
................................................................

  

 

 

 

 

ها بئله موغان بولگه سینین ایستکلی شاعیری بختیار علی مرادی(موغان اوغلو ) دا اوره ک سوزلرینی بئله سویله ییر:

 

نویسنده: بختیار علی مرادی(موغان اوغلو)

چهارشنبه 28 مرداد1388 ساعت: 22:16 

سالاملار یاشیل بی یانار موعلیمین دونیاسینی دئیشمه سی بوتون دوستلارینی او جومله دن موغان بولگه سینده یاشایان شاعرلری ویازیچیلار ی سارسیتمیشدیر .اونون عایله سینه ودوستلارینا باش ساغلیغی وئررک اولو تانریدان اونا رحمت دیله یریک حورمتله (موغان اوغلو)./

 

 

 

 

 

"یانار" مسلکداشیمیزین ان یاخین یولداشلاریندان اولان دویغولو شاعر رضا دهقان(چنگی )حضرتلری ده اوره ک سوزلرینی بئله آچیقلاییر:

 

نویسنده: چنگی

پنجشنبه 29 مرداد1388 ساعت: ۱۲:12 

سالام دیرلی دیلداشیم و مسلکداشیم یاشیل به ی
نئچه گون قوجا قارتالدان اوزاق اولدوغوم اوچون یازیلارینیزا جاواب وئره بیلمه میشم. باغیشلایین.
بیرده اللرینیز آغریماسین کی رحمتلیک یانار جنابلارین یئنه ده یاد ائتمیسیز. بو بیزیم بورجوموزدور. منده بو ایتگینی بوتون شاعیر یولداشلاریما, سیزه 40 ایللیک یولداشی توتقون جنابلارینا و او رحمتلییین عاییله سینه تسلیت دئییرم.

اَجل آغزین آچیب سومورماقدادیر
گؤزو باخا- باخا یوخ اولانلار وار.
دردین اوریینده ساخلاییب، ائله
دوردوقو یئرینده ییخیلانلار وار.
من دونیادا نه لر گؤرموشم گؤرون!

 

 

 

 

ماراغا شهرینده یاشایان دوشونجه لی و ائحساسلی شاعیره ،حورمتلی "خزر "خانیم دا اوره ک سوزلرینی بئله سویله یر:

 

نویسنده: خزر

سه شنبه 27 مرداد1388 ساعت: 20:40 

سلاملار ياشيل بئي
يانار موعلليمين دونيا دييشيليگي مني ده كدر لنديردي ، سيزه و تام شاعير دوسلاريميزا باش ساغليغی دئييب و اولو تانريدان صبير ديله ييرم./

 

 

 

 

 

 

 

 

 

 

 

 

 

 

 

           دئمه لی بیر نئچه هفته بوندان اونجه،"موغان " بولگه سینین اونده ر شاعیرلریندن اولان:   یوسف گلدسته"قوجا"، بختیار علیمرادی"موغان اوغلو"، سخاوت قاسمزاده"سخاوت" مسلکداشلاریمیزین تشبوثو ایله،"کرج" شهرینین گورکملی ادبیات عالیم لریندن :حورمتلی دوقتور "حسین محمدخانی (گونئیلی)" و ها بئله آذربایجانیمیزین خالق شاعیرلرینده ن: اوستاد"صمد مرادی(صمد)"،"تهران" شهرینده یاشایان ایستکلی شاعیرمیز"باغرو" جنابلاری،کرج ده یاشایان شاعیر"جعفرپور"، "موغان" بولگه سینده گوزه ل و بدیعی ادبیات ساحه سینده قورولان قوروم لاردا ایشتراک ائتمیش لر.

اوستاد "صمد مرادی" بونا اساسن "موغان"سفرلری آدلی بیر مجموعه حاضیرلاماقدادیر.اوستاد دوقتور"گونئیلی"جنابلاری دا بو سفری،اونودولماز بیر سفر آدلاندیرمیشدیر.آنجاق "موغان" بولگه سینین شاعیرلری ده بو موناسیبّّّّّّتی قارشی لاماق لا،بو گوروشلری ماراقلی گوروشلر آدلاندیرمیشلار!

بئله لیکله،سوز اوستاسی قوجامان و ضیالی شاعیریمیز "قوجا"موعللیم،بیر دویغولو پیغامیندا،بو ده یرلی گوروش لرده ن سوز آچمیش دیر."قوجا" جنابلاری "سخاوت" موعللیم ده ن بیر "مله ره م..." باشلیقلیغی آدلی دویغولو قوشغو نودا گوزه ل پیغامیندا گتیرمیشلر! بیلدییمیزه گوره بو قوشغو  شاعیرلر بیر بیرلرینده ن آیریلان زامان "سخاوت" شاعیرین اوره ک دویونتوله رینی ترنم ائتمیش دیر!

ایستکلی و باجاریقلی سوز اوستادی،بختیار علیمرادی"موغان اوغلو" جنابلاری دا کرج شهرینده ن ایشتراک ائده ن شاعیرلره اوزه لیکله اوستاد صمد مرادی"صمد" بـی ـ یه اوره کلری اوخشایان بیرقوشغو قوشموشلار!

من ده یئرلی اولاراق،عینی حالدا،بو اوره ک چیرپینتی لارینی و ده یرلی شئعیرلری گوسترمک له "موغان" سفرینده ایشتیراک ائده ن قوناق شاعیرلره و هابئله ائو ییه له رینه اوستون ناییلییتلر دیله ییره م.اینشاالله گله جک ده گوروشلر چوخ،یوللار یاخین،کونوللر محببتله دولو ،آرزولار اوزون و یاشایش لار برکتلی اولسون! 

ایندی "قوجا" موعللیم سویله دی یی دویغولو سوزلر و "سخاوت" جنابلارینین دادلی ـ دوزلی اوره ک چیرپینتی لاری:

" سالام یاشیل بئی/
منتداریق/
سیزه اوغورلار.
دوسلارین وبلاگیندان عنوانیمیز یوخدو// اونا گورا بو بیر قطعه شعری دوسلاردان موغاندا آیریلان زامانی شاعر دوستوموز"(( سخاوت)) بئین اوره ک حیسسی و دویونتوسون ترنم ائده رکن. بیر ارمغان کیمی آدلاری گئده ن استادلارا سنین الینله چاتماغی دیله ئییره م/. هامینیزین یئریز گورسه نیر بوردا...
صمد عمی نی چوخ ساغ اولسون"/
.................................................... 

            ( مله ره م . . . )!

گـــوزياشيمـــي سيــرا داغلار اوستونده
حســرتلـه اَلـــه ديم،! اَلـــه ره م آللاه!!
سوروسونده ن آيــري دوشه ن مارال تك
چوللــــرده ملـه ديم،! ملـــه ره م آللاه!!
*‌*‌*‌*‌*‌*‌**‌*‌**
قايالـــي قارتاللـــي« گونئيلـــي» داغلار
قهـــرمان ايگيديــــن قوينوندا ساخــلار
"باغــــرو" داغــلارينـدا، يارالــي آغلار
آرزيلار ديله ديم،! ديله ره م آللاه!!
چوللرده مله ديم،! مله ره م آللاه!!
*‌*‌*‌*‌*‌**‌*‌
"گونئيلي"، "باغرو" دا، "جوادخان چاغير
قـــويما داغــلار قالا!؟ آتالي ساغيـــــــر!
"صمد"ين سوزلـــري، يانديريب-ياخيـــر!
يئنه درد، شله ديم! شلـه ره م آللاه!!
چوللــرده مله ديم،! مله ره م آللاه!!
*‌*‌*‌*‌*‌*‌*
بــو فلـك باشيمـــا، گتيـــرميـر نـه لـه ر؟!
تورب اَكيـــر باشيمدا، آي" آغلار-گوله ر"
اولــونجه ن "سخـاوت"قــوزو تـك ملـه ر
يانار قور چيله ديم،! چيله ره م آللاه!!
چوللرده ملـه ديم،! ملـه ره م آللاه!!
*‌*‌*‌*‌*‌*‌*‌*
شعر بیر خاطره لی سؤز (( مله ره م آللاه)) اوسته یارانان، سخاوت قاسمزاده دندیر
اونلاریندا سیزه بوللو سالامی وار

ها بئله شاعیر بختیار علیمرادی"موغان اوغلو" جنابلارینین دا ده یرلی، قوشغو سو بیله دیر:

"سالاملار یاشیل قارداش، لوطفا بو شعری (صمد عمی ) دوستوموزا چاتدیرین".

-----------------------------------------------------------------------------------------------------

             "صمدین ائللرینین..."! 

صمدیـــن ائللرینین؛ باغــی گولستان اولــدو
او باغین گول چیچگی، دردلره درمان اولدو
....................................................
مسکن ائتمیش اوزو؛ قزوین و کرج-تهرانی
دیه آی " مشدی قضنفز" یئنه طوفان اولدو
....................................................
یئنه ده بیر اثری چاپ اولاجاقدیر ائله بیل!!
بــو خبر چاتدی بوتون دوستلاری؛ خندان اولدو
.........................................................
یوردونون " اشـــرفی" سی؛ همده "شهودی " لری وار
داغ – داغا آرخا دوروب دیللره دستان اولدو!!
.........................................................
"شهریاری" کی ؛! او "حیدر بابا" نی داغ ائله دی!
اودا مجنون کیمی؛ بیر لیلی یه قوربان اولدو!!
.............................................................
باخ "سهند"ی کی! باشیندا واریدی چال پاپاغی
"سازیمین یازدی سوزون" او ،اوره گی قان اولدو!
............................................................
چاغریب بــو! " موغان اوغلو " ساوالان- " آی ساوالان"
دئیب اوز دردلرینی؛ ائللره اعلان اولدو!!

حورمتلی اوخوجولار!

 دئمه لی یم کی" موغان" سفری ایله ایلگی باغلایان موحتشم شاعیریمیز ،دونه ـ دونه آد چکدییمیز "قوجا" موعللیم ده یئرلی اولاراق بیر چئشیدلی و ان گوزه ل قوشغونودا بو قوروملاردا ایشتیراک ائده ن شاعیرلره ایتحاف ائدیبدیر.

بو قوشغو "موغانا جیران"! عونوانیله قلمه آلینمیش و پوئتیک بیر اثر یاراتمیشدیر.بو قوشغونو بوتون "موغان"سفری ایله علاقه دار شاعیر،یازار،ادبیات ماراقلی سی و هابئله وطن سئور و اوزگورلوک سئون اینسانلارا تقدیم ائدیریک:

              "موغانا جیران...!"

یام - "یاشیل"،یازلیقدا بیــر قـاطـار دورنا
آرازدا چیمدیلــر، گؤلــده سـوزدوله ر!!
جیران سوروسیلـه، دوشـوب یان – یانـا
موغانی سئیر ائدیب، میل ده گزدیله ر!!
* * * * * * * * * * * * * * * **
ایلیشـدی ایلک اؤنجـه، دوغما باخیشـلار
اوره کــده محببت، سالــدی ناخیشـــــلار
سئوینجه ک!گوزوموز، توکدو یاغیشلار
دن-دن میرواریلار، اوزده سوزدوله ر!!
* * * * * * * * * * * * * * * * *
نئچـه مجلس، سـؤز اوستـونده قـورولـدو
ذیللـی-بمللـی، ساز اوستـونده قـورولــدو
تـم – تاراقلــی، ناز اوستـونده قـورولـدو
گیلانلاری چایی! بیر-بیر دوزدوله ر!!
* * * * * * * * * * * * * * * **
دوقتور"گونئیلی" ده!سویله ر اوغوزدان
" دده قــورقــود " او مقــددس قـوپـوزدان
اَل چکمه ئیین، بـو واریـزدان-یوخـوزدان
ائـوؤد وئـــــردی، سینه لــره یازدیــلار!!
* * * * * * * * * * * * * * * * * *
چای قیـــراغـــی، " جواد " قوردو آلاچیق
کهلیک کوسه ر! یاواش– یاواش داغا چیخ!
آمـانلیقــــدا،! قـاققـیلداشیــــر، جیـغ با جیـغ!
بــــو دیاری، جننت کیمــــی، یــــوزدولار!!
* * * * * * * * * * * * * * * * * *
"ائلدار" شاعر، دوشمانلارین، یوردوسو
بیزه قارشی ایگیدلری، یوردو!؟ سو
"ستارخان"ین سانکی دوشّّّه ن اوردوسو
آراز بــــویـــــو وطنمــه، گوزدولـــه ر!!
* * * * * * * * * * * * * * * * *
آیـرلیقــدان ســؤز گئـده نـده اؤتــــــــری
" سید " آچدی، "قانلی گونش" دفتــــری
بابکیمه، چکمیش، افشین خنجــــــــــری
خیانتــــه، هاممــی آغیـــز بوزدوله ر!!
* * * * * * * * * * * * * * * * *
" صمد " عمی! گوئیره لرکن آغلادی
باغریمیزا، " باغرو " ملهم باغلادی
" سخاوت " ین! چال سینه سی چاغلادی
جوؤر کیمی، مله مه ئین، سیــــزدیلار!!

* * * * * * * * * * * * * * * * *

اوخودوقجا " موغان اوغلو " آی آمان!!
(( نه گوزه ل! یاراشیر موغانا جیران!!))
(( خبر توتور، ساراسیندان خان چوبان))
نیسگیل –نیسگیل ماهنی لاردا سؤزدوله ر!!
* * * * * * * * * * * * * * * * *
بیــر دلبـــر گوشـه نـدی! آی آذربایجــان
"قوجا"مان، اولکه ندی بو گوزه ل موغان
گلنـــده حیـرانـدی- گئـده نـده حیـــــــران
کده رلر، بیر اولسا؟! شنلیک یوزدوله ر!!
* * * * * * * * * * * * * * * * * *

 "قارداغ " بولگه سینین "علمدار گرگر" شهرینده یاشایان وولقان طبع لی شاعیری رضا دهقان "چنگی" جنابلاری اوزو بو سفرده اولماسادا، اوره ک سوفره سینی بئله آچیر:

"بیرینجی اورک آرزیمیز بودور کی بو مجازی دونیادا گوروشن شاعیرلر و یازیچیلار بیر گون ائله او موغانین یاشیل دوزونده گوروشلری بیتسین و او شاعیر؟ دئمیش: (دولاناق موغانی میلینن بئله)...( آخاق خان آرازین سئلینن بئله)".

قهرمانلار یوردو "تبریز" شهرینده یاشایان و یئنی قوشغولاری دیللر ازبری اولان سایین"اولکر"خانیم دا  بو ساحه ده بئله یازیر:

"سیز و پوستلاریزدا آدلارینی چکدیییز یولداشلارین اؤزل بیر عالمی وار . آشیق شعریندن چوخ اوزاق یاشادیغیما رغمن هر دؤنه آلقیشا گلنده نم نقدر آدامین گؤرمک هاواسی باشیما دوشور!"

آنجاق نه بیلم! "اولکر" خانیم دئمیشکن:" یوخسادا شاعیرلرین باشقا بیر عالمی وار"،من بو سوزه ایناملا درین حورمت بسله میش،بوتون شاعیرلرین ائحساس،دویغو، تخیل و عینی حالدا رئال دوشونجه لرینی ماراقلا قارشی لامیشام.

اوزه لیکله بو قونونون ادامه سینده چوخلو گورکملی شاعیرلر ،یازارلار عمومی و خصوصی حالدا اوره ک سوزلرینی سویله دیلر و بعضن دویغولارینی بیر جومله ده یا بیر کلمه ده خلاصه ائتدیلر.

ان اوزه ل بیر ایتیفاق اوندا یاراندی کی ،ازبک شاعیرلری ده بیزه قوناق گلدیلر، اونلار قوناق گلمه لری ایله، ائیله بیل باهاری یئنی ده ن ارمغان گتیردیلر!آمما آتا - بابالاریمیز دئمیشکن:"هر گولون بیر عطیری واردیر" و یادا "هر یئمیشین بیر دادی"، دئیه بوتون یاخیندان - اوزاقدان گلن تورک سویداشلارا و دیلداشلارا اوره کده ن سئوینمیشم.

یئرلی دیر پیغام لاردا گورونن اونرلرده ن یئنه ده سوز آچماق ایله خیال قوشوموزو بوتون تورک دونیاسیندا چاپیراق و بیر آن "موغان " - دا،بیر آن "تبریز "- ده ،بیر آن آذربایجانیمیزین بوتون بولگه لرینده و بیر آن دا "پامیر" ایله "سمرقند " - ه بویلانارکن ،"فاریاب " ایله "میمنه" و "تاشکند "ایله "بخارا"دا یئر سالاق!

"اورمو "گولونون سویوندا یویوناق!"خزر" دنیزین ساحیلینده گوی تانریمیزین عظمتینه آند ایچک!"آراز" چای - نین کناریندا یئنی ده ن دوشک و "قوجا" موعللیمیمیزین "موغانا جیران !" ماهنی سینی بیرده اوخویاق!"سخاوت " بی ـ یین "مله ره م!" آدلی قوشغوسونو یئنی ده ن  ترنم ائده ک! قوشغولاری ایله کونوللرده سئیر ائدیب و اینسانلاری سئحر ائده ن"موغان اوغلو" - نو شئعیر اوخوماغا دعوت ائده ک!

"اوجان" یوردونون غئیرتلی،ائحساسلی ائولادی "اشرفی" بی ـ یی بیرده تاپاق و "عین الدین " ایله "جاهانبان " کندلرینین عطیرینی اوندان دویاق!یوخسادا "ساوا" شهرینده دوستلار ایله گوروشمه یه قاییداق و هابئله "مرغئی " کندینی و "حکیم تیلیم خان " مزارینی بیرده زیارت ائده ک!"ساوجی اوغلو" -نون بوینونا بیر چلنگ قرنفیل سالاق! یا دا "مولان " کندینده دونیایا گلمیش وتبریز شهرینده بوی آتمیش "یورغون" قارداشیمی  یوخلایاق و اونونلا بیر دویونجا گوز -گوزه دوراق!!.

"قازان خان" لار سارایی،اولو "سهند "کیمی سوز اوستالارینین قیبله گاهی،"میرزا کریمی " نین ایستی اوجاغی،"خزر " خانیمین یوردو دیاری "ماراغا" شهرینه قوناق اولاق! "سهند " ایله "ساوالان " -ی ،"قافلانتی " ایله "بوزگوشو"،"قاراداغ" ایله "قاراباغ " بولگه لرینی ده دولاناق! شهید لریمیزین مزارینا باش چکک و "آغ دام" ایله"کلبه جر" - ده، حسرت ایله هارای قوپاراق!"خوجالی" یا آیاق قویاندا یاواش - یاواش قدم گوتوره ک!نییه کی بیر نسلین امه گی اوردا زای اولدو باری!کورپه اوشاقلارین بئشیکلرینین سود قوخوسونودا ایندی دویمالییق اوردا!

آتام بیر زامان دئییردی کی اوغول:بیلمیرم نییه شیمالا باخاندا گوزلرینده  هیجان دوغرولور!من او زامان نه بیلیم بیر بالاجا اوشاق اولسایدیم دا،بونو بیلیردیم کی شیمال ایتگینلر یوردودو!آمما هیچ بیلمه ز ایدیم بویوک شاعیریمیز شهریار دئمیشکن:" ایتگین لیک وار! آیریلیق وار!اولوم وار!". یادا هر دم آنام دئیه ر دی کی:" آی اوغلان سنین آتان یونگول بیر کیشی دی!او،آت اوزه رینده ن بیر گون یئره دوشدو و عاشیق "قلیج" - ین ال - آیاغینا دوشه ن دی"!من ده اوشاق نه آنلاییردیم کی آتام نه قده ر یوکسک فیکیرلشیر.

هئچ اونون دا عومورو باشا بیتمه دی و "قاراباغ" دویوشونو گورمه دی و بیزیم کیمی دویمادی! آمما اودا حسرت ایله اوغرون - اوغرون شیمالا باخاردی!یوخسادا حسرت ایله شیمالا باخماغی من اوندان اویرنمیشم!.یا دا نه بیلیم آنام منی ائحساس لار ایچره  قازانمیشدی!همیشه منه دئییردی: "سن پیس بیر اینسان اولانمازسان آی گئده"!.عیللتینی  آنامدان سوراندا؟!، ده ییردی کی:" اوره یین قوش اوره یی کیمی چوخ کوره ک دیر".

قوشغولاریلا همیشه منی حئیرته دالان شاعیر فرمان فرضی مولان " یورغون " جنابلاری،بو قونویا گوره خصوصی اولاراق بیر فلسفه وی و درین اینام لی پیغام قویموشلار،کی ضرورت بیلدیم اونون بیر حیصه سینی بو یازی لارین آردیندا گتیرم .او،بئله سویله ییر:

"بوز تورپاق آلتیندا یاتمامیش یالین

آ دوستلار سیز آللاه قئیدیمه قالین!

تزه  تر چیچه یم!عطریمی آلین!

درمه میش فله یین اللری منی"!

ادامه سینده بئله یازیر:"من،اوزومو بو قایغی یا لاییق بیلمیره م!آنجاق هم سیزده ن،هم ده بوتون دوستلاردان عومور بویو میننتدارام". 

اوجان(بوستان آوا) یوردونون مئهریبان ائولادی سایین "اشرفی " جنابلاری دا پیغامیندا بئله یازیر:

"-بیلمیرم هانسی دیلیلن سیزدن تشککرائدیم کی منی ده بوسفرده اوزیزه یولداش ایله دیز. یعنی منده بئله بیر آزریدا یاشیورام کی آلله ایشی بیرجورگتیره کی محمدشهرده استادیم ((صمد)) آقایا واونلا بیرلیکده سیزه بیرقوناق اولام/اوگونون آرزی سیلا آلله آمانیندا".

گنج شاعیریمیز "هارای "بی ایله شاعیر یولداشیمیز مصطفی شیخ پور "ایشیق سوی " جنابلاری دا اوره ک دویونتلرینی بیز ایله بولموشلر!"ورزقان" - لی ائحساسلی شاعیره میز "صونا " خانیم دا بو گوروشلری قارشی لایانلارا جان ساغلیغی آرزولامیش لار.

ایستکلی شاعیر دوستوموز سایین "سیرداش موغانلی" دا، دویغولارینی بیله چیچکلندیرمیش دیر:

"زحمت چکیب منه دؤنه دؤنه باش چکدیگین اوچون سیزه اؤز درین تشککورلریمی بیلدیریره م و سیزین بو ایشینیز چوخ تقدیره لاییق بیر ایشدیر. اللرینیز آغریماسین .سیزه اولو تانریدان بوتون یاشاییشینیزدا اوغورلار دیله ییره م".

.

اصلینده "میانا" بولگه سینین،"ایشله" کندینده ن اولان "ایشله لی" قارداشیمدا گوزه ل سوزجوکلرله بو قونودان ایستیقبال ائتمیشلر.ساوالان ووقارلی یازار و شاعیره میز سایین ربابه قلی زاده"سئودا" خانیم بیزه گول سوغات گتیرمیشلر!

حئکمت و عیرفان ایله باغلی سایین "حمزه ظریف" حضرتلری ده شیرین و محببتلی سوزلر یازمیشلار.ها بئله اوزبک تورکلری ده اوزلرینه گوره درین سئودالی و ایفاده لی مطلبلر گتیرمیشلر.

بو قونونون آرخاسیجا سئوگیلی قلمداشیم شاعیر بختیار علیمرادی "موغان اوغلو " حضرت لرینین ایکینجی قوشغوسونودا اوزه لیکله سیزلره تقدیم ائدیره م:

"هارالاردا قالدين آي صمد عمي!".

ياد ائللي لر بيزه گوز اولدو قارداش.
آيرييليق يوخوسون بيزه يوزدو لار-
دوندو حقيقته دوز اولدو قارداش.
ترلانين اويلاغي نييه ساردادير ؟
(گونئيلي)هاردادير (عاريف)هاردادير؟
(جاواد)لان، (ياشيل) دا . ائله داردادير.
درديم آرتيب داها يوز اولدو قارداش.
لعنت ترسه دوشن زامانا گلسين.
ياخشي لارين دردي يامانا گلسين.
شاعرلر يغيلسين موغانا گلسين.
بلكه يارا لاريم اوز اولدو قارداش.
فلك (موغان اوغلو) ن وئر ير گودازا.
ايسته رم ائللريم چئخايدي يازا.
اودوركي اوره يم باغالانيب سازا-
دوستلارين ديلينده سوز اولدو قارداش.

بونودا دئمه لی یم کی بو قونو،ده یرلی شاعیر و یازار یولداشلاریمیزین گوجلو قلم لری له گله جک ده داهادا زنگینلشیب و یئتگینلشه جه کدیر اینشاالله!.

                                                                                                              آردی وار