شعر ایستی بیر عالم از کتاب خزانسیز باهار
ایستی بیر عالم
«آیری بیر عالمدیر منیم عالمیم
اوردا نه خزان وار،نه ده قاریاغیر.»
«یورغون»
ایستی بیرعالم دیر منیم عالمیم
بئله بیر عالمده بوز دؤنر کؤزه
اینامیم یولوندا چالیشماق ایچین
اورییم دؤیونر،دیل گلر سؤزه.
وطنی سانارام بیر آنا کیمی
اوغروندا اسرم گول نانا کیمی
دولاننام باشینا پروانه کیمی
سورمه تک تورپاغین چکرم گؤزه.
بو یولدا بیر عاشیق پولاد گئیسه ده
باشی اوزایلارا قالخیب دیسه ده
اولو سئودیگینه باشین ایسه ده
من ده باش ایه رم آنام تبریزه.
بابک قالاسینا سالارام نظر
چکرم آدینی هر آخشام-سحر
منی سئویندیرر او چالان ظفر
ایفتیخار ائیله رم قویدوغو ایزه.
وئرسه لر ده منه بوتون دونیانی
یئنه ده وئرمرم آذربایجانی
بورا گؤز تیکنین هدردیر قانی
قویمام بیر یاد بورا دوداغین بوزه.
1380/5/20
شعر:عسگرعلیائی کلیان(عماد یاشیل)