آچیلمایان بخت
آچیلمایان بخت!!
یازار:عسگر علیائی کلیان (عماد یاشیل)
کرج-واریانشهر-دوشنبه بیست و هفتم خرداد 1387
بو کدرلی دوزگون حیکایه بوتون محنت چکمیش آنالارا و قادینلار ایتحاف اولور.
ایگیرمی نئچه ایل بوندان اونجه،"آصلان پری" آدلی بیر قاری ننه میانانین کاغیذکونان بولگه سینین "قورجا" آدلی کندینده یاشاییردی. ایندی دوولت سندلرینده بو کند گورجق یازیلیر.بئله دئمه لی یم کی او، قاری ننه نین کدرلی یاشایشی اینسانی آغیر فیکره دالیب اوریینی سیخیردی.
قاری ننه نین یئتمیش بئش یاشی اولاردی کی زمانه نین قایغی سی آغیر بیر شله کیمی اونون بئلینی بوکوب,آلنین قیریشدیرمیشدی. بو دونیادا بیر عمی اوغلودان سونرا داها آیری بیر کیمسه یه گومانی گلمیردی! اونون عمی اوغلوسو دا منیم بویوک آتام ایدی کی "کلگان(کلیان)" کندینده یاشاییردی. او، دا یئتمیش آلتی یاشیندا بیر قوجا کیشی دی کی بویوک آنام ایله بیرلیکده بیر اوچقون داخمادا یاشاییردیلار.
آصلان پری ایلده اون گونه یاخین بویوک آتام گیلده گلیب قوناق قالاردی. او,اون بئش کیلومئتیردن علاوه اولان یولو یاییدا-قیشدا پیادا گلیب؛ گئدردی. آنام ایله خالالاریم کی عاییله صاحیبی دیلر آصلان پری ننه یه آرتیق حورمت ائدردیلر.
محنت چکمیش قاری ننه هردن ناهارا یا شاما بیزیم ائوده قوناق اولوب عادی بیر یئمک- له راضیلاشاردی. باشیندان کئچمیش لری دانیشیب,بیر نئچه بند بایاتی اوخویوب آغلایاردی. اونون آغلاماغی کیچیک یاشدا اولسایدیق دا بیزی ده آغلاداردی!
او،زامان من اوشاقلیق رویاسی ایله خیالیمدا بیر گئنیش قصیره صاحیب اولماغیمی گوروب،آصلان پری بی بی یه ده بیر بویوک یئر او قصیرین یوخاری باشیندا نظره آلاردیم.ملک لردن ده ایسته یه ردیم اوندان یوکسک سویه ده ایستیقبال ائتسینلر!!
آصلان پری دئمه لی بیر گنج قیزیمیش کی ایلین آخیر چرشنبه سینده سو اوستوندن آتلانماق اوچون بولاق باشیندا،یولداشلاریلا قرار قویورلار کی ائرته کن یوخودان اویانیب کنددن آشاغی چایا گئدیب؛سودان آتیلسنلار.
او،شیرین بیر عالم ده باختی نین آچیلماسینی آخیر چرشنبه نین ائرته کن سو اوستوندن آتلانماسیندا گورور،گوزل و آیدین بیر گله جه یی خیالیندا مجسسم ائدیرمیش. یوخو آپارمامیش تله سرک آیاغا قالخیر،ائله بیلیرکی یولداشلاری اوندان گیزلی یولا دوشوب و گئتمک لرینی اونا بیلیندیرمه ییبلر. آتا-اناسیندان گیزلی، تئزلی چایا ساری یولا دوشور. گئجه نین عالمین ده سماداکی آیین ایشیغی یئره دوشدوکجه بیر کولگه آصلان پری گئدیکجه اونلا یاناشی حرکت ائدیر. آرزولار باغیندان چیچک آختاران قیز او زامان اوجا سس ایله یولداشلارینی اونله ییر،هئچ بیر کیمسه دن سسینه جاواب وئرن اولماییر. او،اوز گولگه سیندن قورخاراق یاری یولدان کنده ساری گئری قاییدیر.
قورخودان آغیر بیر خسته لییه معروض قالیر. نئچه آی سوووشان دان سونرا یاواش-یاواش ساغالیر،آمما بو خسته لیین اثریندن بارماغلاری بیر بیرینه یاپیشیر و داها هئچ واخت آرالانماییر.
بو اولایا گوره آخیر چرشنبه ده سووا گومانی گلن قیزین سوراغینا هئچ بیر کیمسه گلمه ییر. اونو داها بیر گنج اوغلان سئویب ائلچی دورماییر. دئمه لی اونون بختی همیشه لیک باغلی قالیر. ایللر بویو سوبای قالیر،بیر طرفدن گوده سینین خسته لییی و باشقا طرفدن یوخسوللوغو اونا آغیر بیر یوک اولور و اوریینده قایغی لار یارادیر.
آتا-آناسینی الدن وئرندن سونرا آز بیر موددتین ایچینده باجی-قارداشلارینی الدن وئریر.غم شله سی دئمک له اونو گونو-گوندن لاپ چولقالاییر.
او،چتین بیر وضعییت ده یئنه ده اومید ایله یاشاییر،بیر اوینه ایستی یئمه یه حسرت قالیر،عومور بویو بیر دسته تزه پالتار ائینینه آلابیلمه ییر.
دئمه لی بو دونیادا هئچ بیر خوش گون گورمه ین قاری ننه،تانری نین بیر شوکور نعمت بنده لریندن ساییلیردی.
1360- جی گونش ایلینده دوغو آذربایجانین بهزیستی اداره سینین حورمتلی ایشچیلری آصلان پریدن حمایه ائتمک اوچون اونو تبریزه آپاریرلار. داها بیر خبر اوندان اولماییر،او،داغلارین قاری کیمی گئدیر،آمما اونون نیسگیللی یاشاییشی خاطیره لرده قالارغی اولور.
ایندی ده آصلان پری بی بی نین آدی چکیلنده توکلریم بیز- بیز اولور. اورکده آه چکرکن حزین سس ایله آغلاییب،اونا قوران اوخویوب و روحونو صلوات ایله یاد ائدرم...